ውጭ ጉዳይ ሚኒስቴር ቃል አቀባይ ፅ/ቤት (ነሐሴ 2011 ዓ.ም)፡ የኢትዮጵያና የህንድ ኩባንያዎች የፊት ለፊት ምክክር መድረክ የሆነው ኢትዮ-ህንድ ቢዝነስ ፎረም ነሐሴ 06 ቀን 2011 ዓ.ም በአዲስ አበባ ተካሄደ፡፡

የውጭ ቀጥተኛ ኢንቨስትመንትን መሳብና የቢዝነስ ለቢዝነስ ትስስርን ማጠናከር አላማው ያረገው የቢዝነስ ፎረሙ ከኢትዮጵያ እና ህንድ የተወጣጡ 40 ኩባንያችን አሳትፏል፡፡

የውጭ ጉዳይ ሚኒስቴር የኢኮኖሚ ዲፕሎማሲ ቋሚ ተጠሪ አምባሳደር ደዋኖ ከድር ፎረሙን በንግግር በከፈቱበት ወቅት ኢትዮጵያና ህንድ ረጅም ጊዜ ወዳጅነት ታሪክ እንዳለቸው ገልጸው ግንኙነታቸውን ይበልጥ ለማጠናከር እንደዚ ያሉ መድረኮች አስፈላጊ ናቸው ብለዋል፡፡ ኢትዮጵያ ለውጭ ቀጥተኛ ኢንቨስትመንት ልዩ ትኩረት ሰጥታ እየሰራች ነው ያሉት አምባሳደሩ ከኢኮኖሚ ሪፎርሙ ጀምሮ የውጭ ባለሃብቶችን ለማበረታታት የተሰሩና በሂደት ላይ ያሉ ማሻሻያዎች ዙሪያ ለታዳሚዎች ማብራሪያ ሰጥተዋል፡፡

የህንድ-አፍሪካ የንግድና ኢንዱስትሪ ምክር ቤት ዋና ጸሀፊ ሱናንዳ ራጀንድራን በበኩላቸው ኢትዮጵያ ለኢንቨስትመንት ምቹ ሁኔታን ለመፍጠር እያደረገች ያለችው ጥረት የሚበረታታ መሆኑን አንስተው የህንድ ኩባንያዎች ይህን አጋጣሚ በመጠቀም በኢኖቬሽንና ቴክኖሎጂ፣ በጨርቃ ጨርቅ፣ በምግብና ወተት ማቀናባበር እና በኢንፎርሜሽን ዙሪያ መሰማራት እንደሚፈልጉ ገልጸዋል፡፡   

ፎረሙን ያዘጋጀው በውጭ ጉዳይ ሚኒስቴር የውጭ ኢንቨስትመንት ማስፋፊያና ቴክኖሎጂ ሽግግር ጉዳዮች ዳይሬክቶሬት ሲሆን ከተሳታፊ ኩባንያዎቹ በተጨማሪ የኢትዮጵያ ኢንቨስትመንት ኮሚሽን፣ የኢኖቬሽንንና ቴክኖሎጂ ሚኒስቴር እንዲሁም የውሀ፣ መስኖና ኢነርጂ ሚኒስቴር ተወካዮች ተረካፍለውበታል፡፡ 

የፎረሙ ተሳታፊ ኩባንያዎች በኢትዮጵያ ቆይታዎች በተመረጡ የኢንቨስትመንት ስፍራዎች ጉብኝት ያደርጋሉ፡፡